6 ابريل يوم الاضراب االعام
Submitted by EDITOR1 on الخميس, 03/04/2008 - 04:57.

يوم 6ابريل يوم إضراب عام في مصر

مطالبنا؟

عايزين مواصلات ادميه عايزين مستشفيات تعالجنا عايزين تعليم لاولادنا

عايزين دواء لأطفالنا عايزين قضاء منصف

عايزين أمن وأمان عايزين حرية وكرامه

عايزين شقق للعرسان

مش عايزين رفع أسعار

مش عايزين محسوبيه مش عايزين ظباط بلطجية

مش عايزين تعذيب في الإقسام

مش عايزين إتاوات

مش عايزين فساد مش عايزين رشاوي

مش عايزين إعتقالات مش عايزين تلفيق قضايا

ميعادنا؟

ميعاد الإضراب  في الإسكندرية

ميعادنا بميدان المنشية أمام محكمه الحقانية 6 ابريل الساعة 11 صباحا لنتظاهر ضد الغلاء والظلم والفساد والمحسوبية

ميعاد الإضراب  في القاهرة

التجمع صباح يوم 6 ابريل الساعة 11 صباحا بالميادين العامة بجميع احياء القاهرة (العباسية - الجيزة – المطرية - امبابة – شبرا - .. الخ)

السير على الاقدام فى اتجاه ميدان التحرير - التجمع الرئيسى للأضراب

اعمل حاجه ايجابيه ابعت رسايل او ايميلات لاصحابك بميعاد الاضراب والمظاهره او صور الورقه 5 صور ووزعهم

هتعمل ايه في اليوم ده؟

- ماتروحشى المدرسه ماتروحشى الجامعه ماتروحشى الشغل

- ماتفتحشي المحل ماتفتحشي القهوه ما تشتريش اى سلعه

- إضراب عام عن الشراء .. نعمل إضراب عن شراء اى سلع في اليوم ده وباريت منكنش سلبيين ونشارك كلنا في الإضراب....... مفيش حاجة في البلد ممكن تتغير وإحنا واقفين نتفرج ونقول حسبي الله ونعم الوكيل..... ومش هتتغير لو 10 أو عشرين أو ألف أو حتى مليون واحد هو اللي عارض هو اللي احتج هو اللي قال للظلم لا............ لو مكناش 70 مليون ضد حكومة فاسدة وظالمة ومرتشية مفيش اى حاجة هتتغير وساعتها إياك تقول إن الحكومة بس هي السبب في انك مش لاقى تأكل لازم تعترف انك ساعدت الحكومة بأنك واقف تتفرج عليها وهى بتتدبح فيك وفى اهلك وفينا كلنا

- ممكن كمان ما تشتريش عيش في اليوم ده خالص بحيث يكون أي فرن فاضي خالص يعنى الناس تشترى بزيادة من اليوم اللي قبله,  ممكن كمان نمتنع عن استخدام التليفونات نهائيا سواء الموبايل أو الأرضي,

- الإجماع على تعليق علم مصر في البلكونات

-الإجماع على ارتداء ملابس سوداء و يفضل مطبوع عليها اى شعار للإضراب لو أمكن مع حمل شارة أو اى إعلان عن "إني مضرب احتجاجا على الأسعار

-تم بالإجماع الاتفاق على الإضراب عن شراء أي سلعه لتمثل وسيلة تهديد للحكومة التي لا تعيرنا اى انتباه و لا تحترم وجودنا ولا تحس بمعاناتنا و كذلك الإضراب عن شراء السلع يعتبر تهديد لاى تاجر جشع يرفع الأسعار إننا يمكن ان نتحد لمواجهته عند حدوث حالة شلل في هذا اليوم سيفكر الجشعون ألاف المرات أمام هذا الشعب الواعي

-تم الاتفاق على أن يحاول الجميع قدر استطاعته بكل السبل على الإضراب عن العمل و الغياب عن العمل هذا اليوم و إعلان ذلك قبلها و إعلان الإضراب - لأصحاب المهن الحرجة كالطبيب مثلا أو ما شابه و كذلك لمن لن يستطيع أبدا أن يمتنع عن العمل و كذلك بالنسبة للطلبة الذي يتوافق 6 ابريل مع امتحاناتهم فإنهم سيضطرون للذهاب لمصالحهم مع إعلان الإضراب لبعض أو كل الوقت و كذلك الاعتصام السلمي في مجموعات إن أمكن

-  على من يستطيع النزول للتظاهرات التي ستكون في الميادين الرئيسية بالمحافظات يمكنه ذلك و لكن بعد الاتفاق مع القوى السياسية و منظمات المجتمع المدني على ميعاد و مكان التظاهرات

- على الجميع العمل بجد منذ اليوم حتى الموعد على نشر كل تلك الأفكار بين الشعب المصري و هم أهلنا و أصحابنا و أقاربنا و زملائنا في العمل مستخدمين في ذلك كل الوسائل المشروعة من دعوات صريحة عامه أو فرديه أو إرسال رسائل محمول أو مكالمات هاتفيه أو البريد الالكتروني و المنتديات و المدونات و المواقع الاعلانيه و الجرائد و الصحف و المجلات و الاتصال بالفضائيات .. و كذلك تعليق اللافتات و ارتداء تى شيرت أو شارة يحمل الدعوة للإضراب من الآن حتى ميعاد الإضراب

شارك معانا

علشان نرجع كرامتنا المهدره

علشان نحافظ على اللى باقي لينا من حياه

شارك – أتحرك -  اضرب معنا إضراب سلمى بدون شتيمة بدون غلط  عايزين نكون متحضرين في اعتراضنا على الغلاء لان العالم كله أكيد حيشوف شعب مصر بيعمل إيه عن طريق الإعلام

ومتنساش

ميعاد الاضراب  في الاسكندرية

ميعادنا بميدان المنشية أمام محكمه الحقانية 6 ابريل الساعة 11 صباحا لنتظاهر ضد الغلاء والظلم والفساد والمحسوبية

ميعاد الاضراب  في القاهرة

التجمع صباح يوم 6 ابريل الساعة 11 صباحا بالميادين العامة بجميع احياء القاهرة (العباسية - الجيزة - المطرية - الخ)

السير على الاقدام فى اتجاه ميدان التحرير - التجمع الرئيسى للأضراب

من المعروف ان المسافة من بعض الميادين الرئيسية (العباسية - الجيزة - المطرية - الخ) سيرا على الاقدام سوف تستغرق حوالى ساعتين - وكل مواطن سوف يرى الحشد الهائل من الناس سوف ينضم و بذلك سوف يصل الى ميدان التحرير عدد هائل لن تستطيع قوى الأمن تشتيتها

تعليمات تنفيذ الإضراب:

التحرك عندما يصل عدد الناس المجمعة أكثر من 50 فرد.

عدم التحرك فى اعداد صغيرة - وفى عدم التمكن من ايجاد مجموعة فى المنطقة التى تسكن فيها للأنضمام اليها محاولة الوصول الى مركز الاضراب منفردا .

خلال المسيرة سوف يزداد عدد المشاركين لتزايد الأعداد و زوال الرهبة من المشاركة من البعض بسبب زيادة الأعداد الى الآلاف وأطمأنان الناس بعدم قدرة قوى الأمن فى ايقاف المسيرة.

أحضار زجاجة مياه لتفادى الحر و بعض الطعام أو الحلوى لطول فترة الاضراب

عدم أستخدام وسائل النقل العامة و مترو الانفاق على الأخص بسبب احتمال ان تقوم الحكومة بغلق بوابات محطة السادات ومبارك و المحطات القريبة لوقف الاضراب.

لبس كاب أو طاقية للحماية من الشمس

بالنسبة للنساء لبس ملابس تساعدهم على التحرك و محتشمة

ايقاف السيارات الخاصة بعيدا عن اماكن التجمع و السير على الأقدام

على أصحاب المحلات القريبة من التجمعات الاغلاق فى هذا اليوم

عدم أستخدام العنف ضد اى فرد

ندعوا الله ان يوفقنا من اجل شعب مصر

و الله الموفق                      

 الله ....الوطن

كلنا بنحب مصر

6 ابريل يوم الاضراب االعام
( categories: )

أهم من الإضراب تنظيم الإضراب

Submitted by مجهول (لم يتم التحقق) on الخميس, 17/04/2008 - 18:06.
أهم من الإضراب تنظيم الإضراب نعم بشيء من التنظيم تستطيع أن تشل الحركة في مصر تغلق كل شيء وتخلى الناس يجلسوا فى بيتهم غصب عنهم .. وعلى سبيل المثال بعض النقاط: ** غلق المداخل الرئيسية للقاهرة من الفجر - فالاف يتجهون يوميا للقاهرة من المحافظات للعمل خاصة ساعات الصباح - بأكثر من حيلة (حادثة مدبرة - 5 كيلو مسامير على الأسفلت - إطارات مشتعلة - متاريس) وعلى ما توصل الشرطة وتحاول تحل المشكلة يكون نصق اليوم فات والناس لفوا ورجعو تانى حبذا لو وجدت المشكلة معقدة . ** غلق الشوارع الرئيسية في القاهرة اللى لو اتقفلت تتقفل القاهرة كلها بأعطال أو حرائق او ............. فكروا ** نشر شائعات ان الشوارع هيكون فيها قلق واضطرابات ومظاهرات ومصادمات والناس تحب تمشى جنب الحيط ملناش دعوة خلينا فى بيوتنا. ** التأثير على وسائل الإعلام وإقناعها .. غلق الشوارع اللى فيها مكاتب إعلامية بإطارات مشتعلة أو ومتاريس معقدة أو افتعال مصادمات ... ** متجيش فى فترة امتحانات وتقول إضراب محدش هيعبرك الناس لو هتموت هتخرج ولو مخرجتشى هتسقط وتكره المعارضين كلهم والحكومة تلاقى فرصتها.. ** بعض رجال الدين يسارعون في رفض الاضراب لتبرئة انفسهم من الاتهام بان السكوت تحريض والحكومة تقول دول حلوين سيبوهم يقولو اللى هما عايزينو ** وغيرها كتير بس العمل بإخلاص هو اللى يجيب نتيجة ربنا يقدرنا على فعل الخير لكن من غير تخطيط مش عارفين نعمل إضراب منخرجشى واللا مظاهرات ونخرج واللا ايه اللى يحصل

لا لحسنى مبارك

Submitted by مجهول (لم يتم التحقق) on الخميس, 10/04/2008 - 02:03.
لا لحسنى مبارك على كل عملة ورقية فيكى يامصر ياريت كلنا نتبنا الحملة دية تخيل كل عملة فى مصر مكتوب عليها لا لمبارك الشعب خايف وديه وسيلة سلمية تماما عشان الناس تشجع بعض !!

ادي مصر يلي شككتم في مصر

Submitted by مجهول (لم يتم التحقق) on الاثنين, 07/04/2008 - 13:45.
كلنا معك يامصر مصر الغلابة والحواري والعمال والفلاحين مصر 18يناير.تحيةلكل من يدافع عن حقه في الحياة من يرتضي لحياته جوعا بها فالذل نسج ردائه والعار كل العراقيين معكم في حق مصر بالحياة العادلة

كفاااااااااااا

Submitted by مصرى انفجر من شكلك (لم يتم التحقق) on الأحد, 06/04/2008 - 16:03.
كفااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااية بقى ياراجل حرام عليك .دا الناس فى جهنم يسمح لهم بالكلام (قالوا با مالك ليقضى علينا ربك) انما عدك حتى الكلام محرم!!!!!!!!!!!

فين النتيجة

Submitted by مجهول (لم يتم التحقق) on الأحد, 06/04/2008 - 16:59.
فين النتيجة الساعة دلوقتى 5 مساء النتائج اية فين التأثير على البورصة المعدل بيزيد فين الشعب الناس نايمة محدش بيفكر كفاية حــــــــــــــــــــــــــــرررررررررررررررررام حــــــــــــــــــــــــــــــــــــــــــرررررررررررررام

اضراب ضد اضراب الحكومة

Submitted by مجهول (لم يتم التحقق) on الأحد, 06/04/2008 - 12:52.
بسم الله الرحمن الرحيم نعم هو اضراب ضدد اضراب السلطة. اضراب السلطة ضدد مصلحة المواطن ارتفاع اسعار خراب نظم خراب اجتماعى بكل صورة. اضرب ضددالعجز والسكوت اقسم بالله العظيم كم كنت اتمنى وجودى فى مصر اتمنى من الله نجاح الاضراب من منكم يا اخوتى يتذكر مظاهرات وخروج المجتمع المصرى بأكملة أبان حكم السادات وما اطلق عليها انتفاضة الحرامية. لتكن انتفاضة حرامية وبلطجية فلتكن كذلك مادامت النظرة للوقوف ضد الفساد والمجاعة القادمة بلطجة نعم انا بلطجى وحرامى ابحث عن حقى......

بحبك يا مصر

Submitted by بحبك يا مصر (لم يتم التحقق) on الأحد, 06/04/2008 - 11:38.
لكل واحد بيحب مصر قول لا قول لا للظلم للفقر للمهانه للعجز اصرخ معايا عشان مصر عشانك عشاني عشان ولادك عشان صحابك قول كفايه للفساد عشان ولادك لما يكبروا ما يلومكش عشان سكت

تعبت من كتر الكلام..قصيدة عامية ..محمد الخطيرى

Submitted by الخطيرى (لم يتم التحقق) on الأحد, 06/04/2008 - 09:57.
تعبت من كتر الكلام..سبت القلم..قفلت دفتر ذكرياتى..حاولت أنام لكن فى عز النوم لقتنى برده بتكلم... بصرخ وبتألم على حالى واحوالكم... يا خلق ايه مالكم..الخوف ملجمكم. خوفكم ده سجانكم..هو اللى ضيعكم..وكمان هيمنعكم من أى وقفةحق ترجع بها حقوقكم... يا شعب اصحى وقوم واتحرك...والا هتفضل كده تتفرج معظم بلاد النيا انطلقت...وانت يا دوب لسه بتتدحرج ... يا شعب اصحى وقولها قوية... اصحى وطالب بالحرية وكفاية مذلة وعبودية.. وسنين القهر المنسية

يارب نبقى رجاله

Submitted by مجهول (لم يتم التحقق) on الأحد, 06/04/2008 - 09:38.
يارب نبقى رجاله يا مصريين التعليم باااااااااااااااظ الصحه باااااااااااااااااظت الميه بااااااااااااااااااظت الاكل بااااااااااااااااااظ الموصلات بااااااااااااااااظت الاعلام باااااااااااااااااااااظ الانتماء باااااااااااااااااااظ البلد بااااااااااااااااااظت منتظريين ايه !!!!!!!! باعوا البلد ونهبوا حققوقنا وصرفوها على سياراتهم المكيفه وفيلاتهم الواسعه و وكراشهم الواسعه مش بس كده قعدوا يفكروا ايه الباقى للشعب مبعنهوش ومسرقنهوش اكتشفوا ان فلوس المعاشات والتامينات بالميليارات فسرقوها وبيفكروا ياخدوا منا المرتبات الزاى فاخترعوا الضريبه العقاريه يبقى سيادتك بتاخد مرتب فى السنه كلها 2000 جنيه تدفع فوقهم كمان 500 عشان تسد الضريبه دا لو الجحر الى انت عايش فيه قدره الخبير بان ثمنه 300.000 مثلا يبقى لسه منتظرين ايه منتظريين ايه يا مصريين منتظريين ايه يا مصريين منتظريين ايه يا مصريين هتشلونى حرام عليكم

اوعى تنسي يا مصر بكره

Submitted by مجهول (لم يتم التحقق) on الأحد, 06/04/2008 - 09:12.
اوعى تنسى بواسطة مصرى, on 05-04-2008 16:28 اوعى تنسى يا مصر بكره اصلى جايلك ف الميعاد ده الأمل فى النصر فكره بس محتاجه العناد وانتى طول عمرك مذاكره قاريه ف كتاب الجهاد طهرى ارضك يا شاطره م اللى بايعك ف المزاد م اللصوص وم السماسره واللى زارعين الفساد

معاكم بقلبي ! بحبك يا مصر

Submitted by KOTA (لم يتم التحقق) on الأحد, 06/04/2008 - 07:49.
كان نفسي ابقي معاكم في الاضراب بس معاكم بقلبي وان شاء الله هترجع لينا مصر تاني بخيرها وبناسها وبكل حاجه فيها جميله انا متغرب علشان الرزق بس والله العظيم نفسي ارجع تاني ليها حبيبتي مصر واعيش بين اهلي بحبك اوي يا مصر

ان ينصركم الله

Submitted by محمد جبريل (لم يتم التحقق) on الأحد, 06/04/2008 - 04:53.
ان ينصركم الله فلا غالب لكم- ومن يتوكل على الله فهو حسبه - توكلنا على الله رب العالمين

وانا والبيت كله معاكم

Submitted by مجهول (لم يتم التحقق) on الأحد, 06/04/2008 - 02:04.
وانا والبيت كله معاكم

بلد بتتسرق

Submitted by مجهول (لم يتم التحقق) on الأحد, 06/04/2008 - 01:59.
بلد بتتسرق بقلها نص قرن و لسه فيها خير عمار يا مصر

انشر التعليق مش مستاهل تاخير

Submitted by محمود المليجى (لم يتم التحقق) on الأحد, 06/04/2008 - 01:30.
برجاء نشر التعليق فهم كلمتين نفسى اقولهم وقلتهم

تحيا مصر حرة عربية

Submitted by محمود المليجى (لم يتم التحقق) on الأحد, 06/04/2008 - 01:28.
قولوا جميعا بكره تحيا مصر تحيا مصر عاشت مصر حرة عربية

اللي يحصلني يكسرني ياحكومة

Submitted by الباجوري (لم يتم التحقق) on الأحد, 06/04/2008 - 01:26.
أنا في وادي يا ربي و حكومتي في وادي و الله حاجة غريبة جداً ، مش الحكومة دي بتقول انها منتخبة طيب يا حكومة يا منتخبة احنا اللي انتخبناكي و احنا اللي شاغلناكي عندنا عشان تشوفي مصالحنا و انتي اللي سرقتينا و نهبتينا و قلقتي نومتنا احياء و اموات ، و بصفتنا احنا اللي مشغلينك قررنا نرفدك و نطلقك بالتلاتة غوري يا عفشة و انتي طالق حسي على دم اهلك بقى ايه ده ؟ جبلات ؟ مفيش دم و لا دين و لا اخلاق اتفووووووووووووووه

كفاية نصب كفاية سرقة

Submitted by النصاب والعصابة (لم يتم التحقق) on الأحد, 06/04/2008 - 01:24.
كفاية نصب كفاية سرقة كفاية بيع فى ممتلكاتنا حرام عليكم كفاية كده ارحلوا عنا بقى خلوا ولادنا يعيشوا محترمين زى كل البنى ادمين يامصرى قم انهض فوق من اللى انت فيه مستنى ايه اكثر من كده دانت حتى مش لاقى حق العيش والطعمية يبقى زى ما واحد من المشتركين قالها ( هيصخطوك ياقرد يخلوك ايه ) انا بقول هيسخطوك ياقرد يخلوك حمار محنا كلنا حمير على رأى عادل امام امتى تعملوا حاجة لله من اجل اولادكم والله ازا لم تضربوا بكره فسوف لا تقوم الساعة لكم ابدا ولم ولن ينصلح حالكم ولا حال اولادكم اللى النتو خايفين عليهم بكرة ياكلوا من ورق الشجر لووجدوه ازا ما عملتوش حاجة مجرد وقفة رجل واحد ضد الحرامية سارقى القطاع العام اللى كان سند للدولة ولينا جميعا مقهور ومجروح ومحبط

أنا مغربي معكم

Submitted by محمد ابن الحسن (لم يتم التحقق) on الأحد, 06/04/2008 - 01:19.
السلام عليكم،وطبتم وطاب ممشاكم.
أتمنى من كل قلبي وروحي أن ينجح إضرابكم.
أيعتقد النظام المصري أنه إن أفشل إضراب 6أبريل فقد انتصر في معركته ضد الشعب، أبلغ به الجهل حدا يجعله يعتقد أنه بالإمكان مواجهة إرادة الشعب، ألم يدرس هذا النظام التاريخ ألا يفقه في حركة الشعوب المبدئ القائل أن الشعب أي شعب لايمكنه أن يصمت أمام الظلم.
إن من الأفضل لهذا النظام الجاهل، الذي لا يرى أبعد من أنفه، أن ينجح هذا الإضراب ، عليه أن يحسد نفسه،فهو يحكم شعبا كريما إذا ظلم وجد فيه من يصبر ويدعوا إلا: إضراب سلمي، أيها العالم إسمع: إضراب سلمي. إن فشل هذا الإضراب يعني شيأ واحدا، يعني قيام ثوراث أو بالأصح قيام الفوضى.
اللهم هذا شعب مصر كل مصر يشكي إليك ظلم حكامه، اللهم فأعنه وارفع الظلم عنه.

يا ريت حد يرد على ويفهمنى اعمل اية

Submitted by مجهول (لم يتم التحقق) on الأحد, 06/04/2008 - 01:12.
ياريت لو ترد على واخرة دة اية ما فيش حاجة يتهبط عزيمة الحكومة وقسوتها على الشعب واستخدامها العصا فى حكم البلد وبعد اليوم دة ما يعدى هيرجع كل شىء زى ما كان ولا فى حاجة هتحصل اية الحل الحل فى مظاهرة غير سلمية علشان نعرف الحكومة ان احنا غاضبين جدا ومش موافقين على اللى بيحصل لانى شاب من الشباب ومش لاقى اول الطريق اللى هبتدى علية واكون صاحب بيت وانا اتمنى ان اتكلم مع قائد حركة كفاية ودة اميلى______________vandam_4_ever@yahoo.com

كيفما تكونوا يول عليكم

Submitted by مجهول (لم يتم التحقق) on الأحد, 06/04/2008 - 11:21.
الحل هو أن ينصلح حال الشعب كله فنعود لكتاب الله و سنة رسوله فيكون التغير من الأسفل .... أقول هذا لأن للأسف مع كل هذا يقف جزء كبير من الشعب سلبي ولا يفعل شيئا

انا لا اوافق

Submitted by مجهول (لم يتم التحقق) on الأحد, 06/04/2008 - 00:20.
انا لا اوافق علي هذا الاضراب لان التغيير من الناس انفسهم وليس الحكومه حتي لو كانت ظالمه اتقوا الله كل في مكانه تنصلح الدنيا ونملكها فكيف تطالبون باضراب ونحن لا نطبق اوامر الله ورسوله فالفتيات كاسيات عاريات في كل مكان هل امرتهم الحكومه بذلك والشباب وسلوكه ايضا وقبل ذلك كيف تطالب حكومه ان تحكم دوله حكما عادلا خاليا من الاخطاء وانت في بيتك لا تستطيع ان تحكم اسرتك واهللك بالله عليكم فلا يهرب كل من مسئوليته ويقول الدوله والحكومه والله الموفق والهادي

أنا أعارضك الرأي يا مولانا

Submitted by هــــيــــــتـــــــلـــــــر (لم يتم التحقق) on الأحد, 06/04/2008 - 02:43.
أنا موافق على الاضراب وبرد عليك يا مولانا بآية في القرآن بسم الله الرحمن الرحيم ( ان الله لا يغير ما بقوم حتى يغيروا ما بأنفسهم )صدق الله الهظيم... ومن الآخر انك تعمل حاجة أحسن من لاشئ وتفضل قاعد تتفرج وخلاص وعلى كل لو مش موافق على الاضراب ممكن تبقى تريح في البيت شوية وتتابع في التليفزيون وبصراحة اكتر مش عايزين آراء انهزامية لأن دي مشكلة شعب مش مشكلة بنطلونات ضيقة وكلام من دة والعبرة مش بالمظاهر والكلام في الدين عشان فية واحد شيخ في منطقتي تسمع منه احلى حكم ومواعظ وعندة فرن عيش بلدي بيبيع الرغيف الصبح ب20 قرش عشان مفتشين التموين بيمروا الصبح ومن الساعة 3 العصر مع خروخ الموظفين بيبيع نفس الرغيف بتاع الصبح بنص جنية .... صباح الفل يا مولانا

"إن الله لا يغير

Submitted by أشرف (لم يتم التحقق) on الأحد, 06/04/2008 - 02:26.
"إن الله لا يغير ما بقوم حتى يغيرو ما بانفسهم-صدق الله العظيم" هذا يا أخي تغير مابانفسنا كما أن في كل مجتمع الصالح و الطالح و الله ينقذ القرية بالصالحين فيها و لو كان فرداً واحد فقط, فلتكن أنت هذا الصالح و لتغير ما بنفسك حتى يغير الله ما بك, و لتقف في وجة الظلم و تقول لا, فالساكت عن الحق شيطان أخرس فلا تسكت عن الحق و لا تجعل من نفسك شيطان أخرس أعرب عن رفضك و إذا كنت لا تشعر بالأذمة -أكرمك الله- فلتنصر المظلوم و الفقير ولتنظر لمستقبل أولادك و أخيراً فإن الله قد أمرنا بالوقوف في وجه الظلم ولكن دون أذا لأحد فلتكن مشركتك إيجابية و فعالة فلا تضر و لا تدمر و إنما إعترض بتحضر كما سيفعل الكثير.

نام يامصري

Submitted by مجهول (لم يتم التحقق) on الأحد, 06/04/2008 - 01:43.
انا خايف بعد سماع اغنية سيد درويش (اقوم يامصري اقوم يامصري )يحصل حماس للشعب وبعد ذلك اول مايري ويشاهد الشوم والعصا من الامن المركزي يجري ويشغل اغنية ( نام يامصري نام يامصري )

نفسى اتضامن معاكم اعمل اية المحافظات ليس لها نصيب

Submitted by مصرى خايف (لم يتم التحقق) on السبت, 05/04/2008 - 21:38.
كنت اتمنى ان اكون مقيم بالعاصمة لكى اشترك معكم فى هذة الصرخة التى ضاقت بها الصدور بجد احنا خلاص معدش حاجة الواحد يبكى عليها لان العيشة دلوقتى خلتنا زى الثيران الى دايرة فى الساقية ومش مكفى بسى انا عايز اعرف انا من الاسماعيلية ممكن اعمل اية وفين مكان التجمع فى محافظة الاسماعيلية

ربنا يوفقنا

Submitted by مجهول (لم يتم التحقق) on السبت, 05/04/2008 - 18:52.
أنا و مراتي قاعدين دلوقتي مع بعض في كافية و أول ما فتحت النت و دخلت على الموقع لقيتها بتسبقني في القراءة و لأول مرة تهتم بموضوع زي دةز و هي عايزة تنزل و تشارك في التضاهر و أنا بصراحه خايف عليها و عايز أأقولها لأ بس مش قادر ألهم إنصرنا على القوم الظالمين ألهم نجحنا في إختبار الرجوله والوطنية دة يارب نبقى رجاله و عندنا نخوة وكرامة لازم نغضب أنا معاكم و مراتي معاكم ربنا معانا

انا والبيت كله

Submitted by مصراويه (لم يتم التحقق) on السبت, 05/04/2008 - 17:41.
انا والبيت كله هنصامن مع الاصراب لانا نفسنا بجد ناخد حقوقنا

لنا تسكتنا قوى عن المطالبة بحقنا

Submitted by موقع معارضه (لم يتم التحقق) on السبت, 05/04/2008 - 16:51.
انا لا اطلب منك التكسير والهدم ولكنى اطلب منكم التصرف كشعب متحضر لنثبت للجميع اننا المصرين الذين لن يناسهم التاريخ ولذالك وقفت اولكم وفتحت موقعى لكل واحد مصرى نفسه يعبر عن رأيه فى بلده للكل قول رأيك موضوعك مقالك رأيك كله هيتنشر هدفنا هو كشف الحقيقه وازالة النظام الظالم المستبد ولذالك فلنقف جميعا ونرفع ايدينا ونقول " لا للطوارىء ، لا للغلاء ، لا للتعذيب ، ......... " وقد فتح موقع معارضه زراعه لكل من يشرفنا بأشرافه او بمقالاته او رأيه فساهموا معى جميعا . Www.Mardah.TK

موقع معارضه دوت

Submitted by مجهول (لم يتم التحقق) on الأحد, 13/04/2008 - 23:33.
موقع معارضه دوت تى كيه ده تحفه والله وربنا معاك يا برنس وينجح كده وكلنا معاك

نفسى بجد اليوم

Submitted by مجهول (لم يتم التحقق) on السبت, 05/04/2008 - 16:42.
نفسى بجد اليوم ده يتم ذى ما كل مصرى بيتمنى او ذى ما انا بتنى عايزين نورى للعالم الظلم الى احنا فيه اشوفكم بكرة

من اجل مستقبل افضل

Submitted by شادى امبابه (لم يتم التحقق) on السبت, 05/04/2008 - 14:14.
لازم لازم يا جماعه منستهونش بلموضوع ده ونتعامل بجد وبدون سلبيه عشان نغير حاجات كتير اوى غلط فى البلد وفحقنا وكرامتنا والساكت عن الحق شيطان اخرص

الفرصة اللى كلنا مستنينها

Submitted by fatematolzahraa (لم يتم التحقق) on السبت, 05/04/2008 - 13:09.
انا هشارك ويارب نبقى على الاقل عشر الاف.......... للاسف انا فقدت الثقة فى رجالة البلد...........خليكو رجالةوشاركو حتى لوكنتم مش متاثرين بمشاكل البلد لان يمكن اللى متاثرين ميقدروش ييجوا لانهم محتاجين لكل نص يوم عمل وانا مش معاهم فى كده

الله ............ الوطن

Submitted by مجهول (لم يتم التحقق) on السبت, 05/04/2008 - 09:58.
بجد الشعب صحى فعلا .............. انا موش مصدق اننا اخيرا حنتحرك ضد الحكومه الظالمه المهمله فى حقنا ..... بكفايانا بقا سكوت عن حقنا فى النعيم وحقنا فى العيش فعلا بداخل وطنا .... انشاء الله اليوم يوم الاضراب دا حينزل زى القنابل فوق الحكومه الفاسده اللى نهبانا وسرقانا ومشردانا .... ويارب تكون الضربه الاكبر فوق راس مبارك الزعيم الفاسق .. صاحب اول ضربه جويه . ( انا متهيقلى انه ماضربشى الضربه دى على اسرائيل ... لآلآ دا ضربها على مصر )

يلا بينا يامصريين

Submitted by حوده الاسكندرانى (لم يتم التحقق) on السبت, 05/04/2008 - 06:55.
وانا معاكم قدام الظلم والفساد قدام الى بيحاولوا ينتهكوا حقوقنا وادميتنا قدام كل مخبر وامين وظابط اتحدى العدل والحق قدام كل واحد كان سبب فى حياتنا الى بقت رخيصه لازم كلنا نقول لا كفايه هروح قدام محكمه الحقانيه وهقول لا حتى لو موتونى مش هخاف لانى ده كده ميت يلا بينا يامصريين نقول لا ولو مره واحده هتفرق كتير لا للظلم لا للفساد السياسى والاقتصادى لا للرشوه نعم لمصر لانى بحبك يامصر

Ana isA hashtarek fi el

Submitted by Engineer_bodybuilder (لم يتم التحقق) on السبت, 05/04/2008 - 03:35.
Ana isA hashtarek fi el edraab we 2olt leee kol elly 2a3rafhom 3alael FACEBOOK wee isA haygeb natiga

يا ميسر الحال يارب

Submitted by مجهول (لم يتم التحقق) on السبت, 05/04/2008 - 03:34.
يارب منطلع شعب جبان ونطلع يومين وفى الاخر نرجع جرى على الاستاد علشان ماتش الاهلى والزمالك ونقو نعم لمبارك حبيب الملايين

Ana kaman isA hashrek fi el

Submitted by Engineer_bodybuilder (لم يتم التحقق) on السبت, 05/04/2008 - 03:33.
Ana kaman isA hashrek fi el edrab wee ba3at lee nas keter 3ala el facebook ,3ashan nesharek kolena isA yeb2a fi natiga

هام جدا وياريت الرد

Submitted by مجهول (لم يتم التحقق) on السبت, 05/04/2008 - 02:02.
انا من المنيا ونفسي اعرف مقفنا يوم 6 ابريل ايه مفيش اي حاجة وصلتلنا ولو فيه التجمع فين ياريت الرد

عزيزى المنياوى

Submitted by EDITOR1 on السبت, 05/04/2008 - 02:15.

عزيزى المنياوى ،،

اهلا بيك .. وشكرا على رسالتك يمكنك مراسلتى على الاميل sar60@ yahoo.com 

تحياتى

والله حرام

Submitted by مش مهم انا مين المهم انى من البلد دى (لم يتم التحقق) on السبت, 05/04/2008 - 00:44.
انا واحد من الشباب زى كل الشباب انفسى اشتغل واتجوز ويكون ليا بيت بس للاسف ده مش فى عصر مملكه مبارك ماهى مملكه مش جمهوريه ياريت نغير شئ مش بالكلام بس لا بالفعل كمان وانا معاكم ولو فيها موتى +

والمصريين في السعودية معاكم

Submitted by مجهول (لم يتم التحقق) on السبت, 05/04/2008 - 00:21.
انا اسمي محمد كامل مهندش في السعودية ربنا معاكم وانا كنت بتمنى اني اكون معاكم بس انا والله اوعدكم اني هتابع وهبعت وادي واصلي وابعت لكل اصحابي ملسمين ومسيحين عشان احنا كلنا مصريين ولو مكناش ايد واحده يبقا هنموووووووت وملناش حق في اننا نعيش حسبي الله ونعم الوكيل واحب اقولكم حاجه كل الناس اللي هنا في السعودية معااااااااااكم وبتقول ربنا ينصركم

العبره بالنهايه

Submitted by عايده (لم يتم التحقق) on الجمعة, 04/04/2008 - 18:12.
انا فرحانه جدا ان الشعب المصري اخيرا هيتحرك ويقول لا بدل الصمت الي عايش فيه بس ياريت يكون الشعب مش كام واحد يقول لا والباقي يقول انا احسنلي امشي جمب الحيط وعلي فكره مش الحكومه بس هي الي جشعه لا كل واحد معاه فلوس هو كمان جشع وبيستغل الناس وماتفرقشي معاه كل المطالب بتاعتنا ديه والناس ديه هي الي بتقوي الحكومه - بجد ربنا يوفقنا كلنا في اننا نوصل كلمتنا للحكومه ولكل انسان جشع بس كمان اهم حاجه النهايه ورد الفعل يعني متبقاش نار تشتعل وشويه ميه تطفيها بجد ربنا يوفقنا

All that is necessary for

Submitted by مجهول (لم يتم التحقق) on الجمعة, 04/04/2008 - 16:27.
All that is necessary for the triumph of evil is that good men do nothing. - Edmund Burke

ربنا معانا

Submitted by رباب (لم يتم التحقق) on الجمعة, 04/04/2008 - 16:09.
ارجو من السادة الرجال المشاركين ان يراعوا موقع البنات والسيدات ى المظاهرة عشان البهدلة اللى حصلت لنا قبل كده ممكن نكون محاطين بالمتظاهرين عشان الاسلوب الرخيص بتاع بلطجية الشرطة وعلى كل حال لابد من السيدات والبنات تلبس لبس مقاوم ممكن بنطلونات وبلوزات طويلة وربنا معانا

انا خارج

Submitted by اخوانجي بمووووت في مصر (لم يتم التحقق) on الجمعة, 04/04/2008 - 11:25.
انا خارج مصر اسمي شريف عبد العاطي- ومش خايف- ربنا يستر كان نفسي اكون موجود ان شا الله اموت شهيد و اخش المعتقل انا دلوقتي ببعت رسايل من النت عشوائيا على ارقام موبايلات في مصر عشان الاضراب وهكلم امي ما تشتريش حاجة وكل اللي هقدر اتصل بي من المعارف يارب يقتنعوا وما يخافوش لو عدد كويس شارك الحكومة والامن مش هيقدر يعمل حاجة اللي حابسنا خوفنا وهو ده اللي مقويهم ان شاء الله اضراب ناجح بس يارب يكون موفق ومنظم وحضاري ونحافظ على بلدنا والناس اللي حوالينا مش مشاركين مع خالص دعواتي قوم يا مصري مصر دايما بتناديك قوم بنصري نصري دين واجب عليك

انهضى يامصر

Submitted by مجهول (لم يتم التحقق) on الجمعة, 04/04/2008 - 06:34.
رجالة وطول عمر ولادك يابلدنا رجالةوان شاء اللة لا يصح الا الصحيح طفح الكيل ودقت ساعة العمل

مصر هتفضل غالية

Submitted by بحب بلدي (لم يتم التحقق) on الخميس, 03/04/2008 - 23:32.
مصر هتفضل غالية عليا....قول لأ ده حقك ..حقك تلاقي قوتك حقك تعيش بكرامة او علي الاقل تموت بكرامة

مصر هتفضل غالية

Submitted by مجهول (لم يتم التحقق) on الخميس, 03/04/2008 - 23:27.
مصر هتفضل غالية عليا.....اتحرك واعمل اي حاجة قول لأ دة حقك

انا معاكم

Submitted by رباب (لم يتم التحقق) on الخميس, 03/04/2008 - 22:34.
والله حاولت اعمل اللى عليه وارسلت اميلات كتير واتكلمت فى المترو وبلغت اصحابى وحتى اللى معرفهوش كمان وزى ما صورت مظاهراتكم يوم التعديل الدستورى حاكون معاكم باى صورة وحالبس اسود حاتعرفونى من الدموع اللى حاتكون فى عينى علشان انا باعشق مصر
12التالية ›الأخيرة »

خيارات عرض التعليق

اختر الطريقة التي تفضلها لعرض التعليقات، ثم اضغط على "احفظ الإعدادات" لتفعل التغيرات.

علِّق

محتويات هذه الخانة سرية ولن تظهر للآخرين.
  • Allowed HTML tags: <span> <div> <br> <p> <quote> <blockquote> <table> <td> <tr> <h1> <h2> <h3> <h4> <h5> <h6> <b> <i> <u> <a> <em> <strong> <cite> <code> <ul> <ol> <li> <dl> <dt> <dd>
  • يمكنك أن تكتب بالعربية و لغات أخرى من اليمين و سينساب اتجاه الكتابة تلقائيا بالشكل الصحيح.

معلومات أكثر عن خيارات التنسيق

CAPTCHA
This question is for testing whether you are a human visitor and to prevent automated spam submissions.
6 + 5 =
Solve this simple math problem and enter the result. E.g. for 1+3, enter 4.